Spelet om Herman og huldra

På sjølvaste Jonsokaften 2023 har vi premiere på det historiske spelet «Herman og huldra» på husmannsplassen Vikje i Eikangervåg, Alver kommune.

Stykket handlar om livet i Eikangervåg rundt forrige århundreskifte, og er basert på historiske kjelder, forteljingar og tekstar frå Herman sjølv. Her møter ein bygdeliv, amerikadraumar og livets sorger og gleder i ei lita bygd i ei stor verd, og det heile krydra med huldra sitt stadige nærver.

Manus og regi er ved Lars Voss Sørhus. Herman som vaksen blir spela av Tor Halvor Halvorsen, kjent frå teaterscener i Alver og Bergen. Læraren, forteljaren, blir spela av Jonas Fuglevik Urstad, skodespelar med erfaring frå fleire av dei største teaterscenene i Norge. I tillegg har stykket nær 30 lokale amatørar i små og store roller.