Aktuelle alternativer
Detaljer
Vi gjentar suksessen frå i fjor, og ynskjer dykk velkomne til årets påskekrim! I år får de møte Jølet gard, der noko mystisk har skjedd. Eit skrin med pengar har forsvunne, klarar du å finne dei att før det er for seint? Påskekrimmen har anbefalt alder 10 år og oppover.
Inne kan du få lage pynt på vår påskeverkstad, karde og spinne ull av lokale sauer og veve deg eit band på kabylsk vev. Du kan også sjå årets utstilling Dyrebar, som handlar om korleis vi har nytt dyra som ressurs gjennom tidene.
Museumsbutikken held ope heile dagen og i kafeen er det påskestemning.
Om museet:
Viss du er nysgjerrig på korleis folk i Nordfjord har levd dei siste 400 åra, kan du få nokon svar her. I friluftsmuseet i Jølet på Sandane, kan du rusle oppover langs elva mellom bjørk og furu og sjå 44 hus frå ulike tider og stader. Utforsk stover og stabbur, eldhus, låver og fjøs, stall og støyl, hunde- og hønsehus, ei skulestove og jamvel eit fargeri. Du kan også sjå korleis krafta frå rennande vatn har blitt brukt gjennom historia. Langs elva kan du sjå både kvernhus, stampe, sag og hjulhus, knytt saman av dammar og renner.
Ved fjorden, like utanfor Sandane sentrum, ligg vår største gjenstand – Holvikejekta, bygd i 1881. Det 20 meter lange fartøyet er det einaste bevarte av dei store klinkbygde jektene, som gjekk med varer mellom vestlandsbygdene og Bergen. I hovudbygget finn du kulturhistoriske utstillingar, kafé og museumsbutikk. I sommarsesongen er omvising i friluftsmuseet inkludert i billetten.