Topptur til Sauesnyken frå Øvre Heggebø

Fin og mykje brukt tur som gjev flott utsikt over Bøfjorden, ytre delar av Sognefjorden og indre del av Hyllestad kommune og Lavikdalen. Eit fint utgangspunkt for lengre turar eller rundturar, både mot Handalsstølane, Heggetjørna, Hellebøstølane og Laviksåta.

Mesteparten av turen går gjennom kombinert bar- og lauvskog. Første del av stien er på skogsveg, og er relativt slak. Frå Bråstadstølen vert det brattare stigning, og stien ber preg av mykje bruk - og kan vere glatt dersom det er vått i terrenget. Etter kvart kjem ein over i fjellterreng, med mindre vegetasjon, og betre underlag for stien. Ein passerar ei antennemast like før toppen, som ligg på 507 meter over havet. Ein kan også velje å gå frå Handalen, Laviktrangane, Hellebøen eller Bråstad.

Turen er ein av fjelltrimpostane i Hyllestad, og ein kan skrive seg i boka på toppen.